Gebore bini vor 36 Johr amne früehne Tsischtig Morge im September, das mem Morgemönsch sii hani ned bibhalte...

Glehrt hani ursprünglech Hotelréceptionistin & Kauffrau, schlussendli gschaffet hani als Leiterin Finanze & Personalwese

I mim Hirni (und uf mim PC) sind immer ganz viel Tabs offe und ich ghör zu dene Mönsche mit 1000ig Interesse. Ha müesse lehre, det drin s'Positive z'gseh und mi ned defür z'verurteile

Mini Interesse beinhalted, schlofendi Büsis und Hünd zue z'decke weni sie gseh, nur füre Fall dass sie chalt hend

Mängisch dänki, ich würd eher ine anderi Ziit ghöre, wels mer oft z'luut esch i dere Wält, i gärn weniger Reiz usgsetzt wär, nöcher ade Natur und ihrem Rythmus wet läbe und froh wär, wenn chli meh mönschlichi als künstlichi Intelligenz ome wär

Intuition, Magie und alts Wüsse fasziniered mech sehr und drum isch es au Teil vo miner Begleitig uf mini ganz eignigi Art

Ha als jungi Frau erläbt wases heisst inere Beziehig mit körperlicher und psychischer Gwalt z'läbe und wie wieder drus use z'cho

Bi übelst bindigsgstört gsi... (die wo mech wend wot ich ned und die wo ech wot wend mech ned, ech muess kämpfe um Liebi...)

Ech ha mi mis ganze Läbe "andersch" und ned drii passend gfühlt und drum send bi mier ganz bsunders au die Mönsche härzlich Willkomme, wo das Gfühl au kenned! Mer esch es mega wichtig, dass sech jede Mönsch i siner Einzigartigkeit bi mier wohl und gseh fühlt!