D'Magie wo en Mönsch umgit, wo absolut sich sälber isch, fasziniert mich unglaublich. Ich weiss wie viel Muet dases chostet authentisch z'sii und vorallem z'ersch überhaupt wieder usezfinde, unter allem womer worde isch, wer mer i sim Innerste isch und wet sii.

 

Für mich het sich immer wieder zeigt, dasi ned glücklich bi, weni mi irgendöpisem apasse, zum dripasse oder dezueghöre. Nachdem i sehr jung scho en Kaderposition gha ha ide Finanze/HR, hani mini brueflich Richtig par Mal gänderet und debi uf guets Ikomme und "Asehe" verzichtet, ufde Suechi nach dem womi erfüllt.

 

I junge Jahr hani physischi und psychischi Gwalt inere Beziehig erfahre was mini Beziehigsfähigkeit ned grad positiv beiflusst het. Sprich ich han de guete Männer s'Härz broche und a dene fest ghebt wo Schmärz, Sehnsucht und Drama verursacht hend. Langsam hani das im Chopf afange tschegge, ha Büecher gläse, mi informiert, aber has glich ned werkli gschafft öpis dra z'ändere. Es esch i mim Gfühl und Körper noni acho. Schlichend hani gsundheitlich diversi Problem entwicklet i all dene Johr wonis noni gschafft ha, das woni weiss au wörklech z'integriere. Wie bi so velne het alles zäme ergendwenn en (wie au bi so velne, nur für mich sichtbare) Chlapf gäh, womi zwunge het mi ändli töifer demet usenandzsetze.

​

Ech ha nomeh Büecher gläse, Körs und Usbildige afo bsueche. Han afo usefende wie krass Körper, Geist und Seel werkli zämehangt. Und mit jedem Wüssens-Puzzleteili wo weder irgendwo inepasst het und glichziitig met mim körperliche, afange Gsund wärde, beni langsam zum Freak was ganzheitlichi Gsondheit agoht mutiert.

​

Und zunere Spiritante... aber meh sone dunkel, mystisch und viel z'viel fluechendi Häx. Und etz dänksch velech, okey, aber die ganz Siite esch farbig wie nüt anders... Ja, ich bi so ungföhr d'Mischig us de lingge und rächte Zimmerhälfti, wenn weisch wasi meine (Wednesday uf Netflix).

 

Du merksch velech langsam, was mem "eigenartig" ufde Startsiite gmeint esch. Und du dafsch bi mer genau so eigeartig sii...ebe genau uf dini Art. Und ich freu mi mega druf dis eige- und einzigartige Wese kennezlehre!