Julia Noser über mich_edited.png

D'Magie wo en Mönsch umgit, wo absolut sich sälber isch, fasziniert mich unglaublich. Ich weiss wie viel Muet dases chostet authentisch z'sii und vorallem z'ersch überhaupt wieder usezfinde, unter allem womer worde isch, wer mer i sim Innerste isch und wet sii.

 

Für mich het sich immer wieder zeigt, dasi ned glücklich bi, weni mi irgendöpisem apasse, zum dripasse oder dezueghöre. Nachdem i sehr jung scho en Kaderposition gha ha ide Finanze/HR, hani mini brueflich Richtig par Mal gänderet und debi uf guets Ikomme, en ruhigi Chogle schiebe und "Asehe" verzichtet, ufde Suechi nach dem womi erfüllt.

 

Ide Liebi hani jung dörfe erfahre, wases heisst psychischi und körperlichi Gwalt inere Beziehig z'erläbe. Wel mier denn ned bewusst gsi isch, wie viel das i mier agrichtet het, hanis leider au ersch sehr viel spöter ufgschaffet und unterdesse einige guete Männer s'Härz broche. Und mier sälber, in dem i a Männer fest ghebt ha, wo mi weder gschätzt, no respektiert hend.

Irgendwenn hani de Muet gfasst, ehrlich häre z'luege. Und zwar bi mier. Mini eigete Wunde z'finde und afange z'heile. Das esch en ewig währende Wäg, wo au etz ned fertig esch, woni inere gsunde Beziehig mimne wundervolle Maa bi. Und ech glaub das esch öpis vom wichtigste, woni der wet uf din Wäg gä: Dis Läbe, dini Theme, eifach alles - das bliibt. Egal wie oft de Partner oder de Job wächslisch. Wie viel id Ferie gasch. Ob Mami wirsch oder ned. Es isch und bliibt dini Ufgab, dier sälber din best Fründ z'sii und für dich z'Sorge.

Met mim Muet und mim Härz weti di astecke und der Chraft gä. Dich z'heile. Dini Wahrheit z'finde und z'läbe. Dini wundervolli Einzigartigkeit z'zeige.

Ech freue mi riesig druf, DICH z'gseh!

Beige Classic Feminine Beauty Website(1)_edited.png

Sternzeichen: Jungfrau

Mond: Schütze

Aszendent: Jungfrau

Beige Classic Feminine Beauty Website(4)_edited.png

Ech liebe Büecher und würd mer am liebste e chlini Bibliothek irichte. Lise meistens mehreri Büecher glichzitig im Wechsel. Liebe Büecherbrokis und versuech au werkli ame Büecher z'bringe und ned nur z'hole...

Beige Classic Feminine Beauty Website(5)_edited.png

Mini Lieblingsserie spieled alli i vergangene Ziite. A erster Stell stöhnd Outlander, Vikings und The Last Kingdom. Ebefalls ufde Liste sind Peaky Blinders, Luna Nera, Reign, The Witcher und au no par us aktueller Ziit.

Beige Classic Feminine Beauty Website(2)_edited.png

D'Cayenne und de Bubi sind sit 10 Johr mini chlii Familie. Chatze sind so sanft und glich eigewilligi Kämpfer. Sie verlönd sich uf ihri Intuition, sind chlini magischi Heiler und geduldigi, wildi Jäger.

Beige Classic Feminine Beauty Website(3)_edited.png

D'Häx i mier liebt d'Natur, d'Elemänt, Pflanze, Tier, Räuchere, Edelstei, ätherischi Öl, Medialität, mis geistige Team, Chrafttier, Tarot, Orakel, alti Brüüch, Ahnearbeit, Mythologie, Poesie, Schatte & Liecht

WAS MEIN ICH MIT magisch?

Für mich isch so vieles magisch und du chöntsch bestimmt ganz es anders Wort defür bruche. Aber genau das isches au, muessmer immer alles so gnau definiere und bestimme? Für mich isch vieles magisch wo eifach so im Alltag passiert, aber so viel Mönsche de Blick defür gar nüm hend.

 

Ech fends magisch wenn Schnee vom Himmel gheit. Wenn mer mitere völlig frömde Person en Unterhaltig füehrt und e Verbindig gspürt. Wie sich so vieles um eim veränderet, wenn mer sini eigene Theme agoht. Wenn im Wald en frömde Hund scho vo Wiitem schwänzled und zu dier häre zieht, weler scho gmerkt het, dass er di mag. Wie heilsam dases cha sii, mim richtige Mönsch Ziit z'verbringe. Wie viel heilerischi Chraft für eus sälber, i jedem vo eus und de Natur steckt. Wenn mer sich bewusst wird, i wie vielne Mönsche vor eus scho s'gliche Bluet gflosse esch. Was füren unglaublichi Tier- und Pflanzewält dases git. Wie sehr eim Musig chan berüehre. Wieso mer gwüssi Mönsche wo eim begägnet sind, oder mer kenneglehrt het, nie meh vergisst. Wie nährend, dass Geborgeheit für eim sii chan. Wie sich Freiheit afühlt. D'Faszination, de Mond und d'Stärne z'betrachte.

 

Du gsehsch, ich chönt en ganzi Siite fülle mit Sache wo für mich magisch sind und für dich vilicht ned. Und genau das Wünschi mer, dass du din Fokus uf das lenksch, wo für dich magisch isch. Neugierig z'sii. Der die Sanftheit zuegestoh, dich a chline Sache z'erfreue.

Kennsch s'Lied "Jagge" vo Dabu Fantastic? "Mini Jagge het en Innetäsche, wo immer volle isch mit Züg. Mini Jagge het en Innetäsche nur für mich. Und bringi sie zum Wäsche, leeri Täsche vo dem Züg, wel das set mer alls ned Wäsche, das ghört mier. Ghört alles mier." Das Lied bedütet ganz bestimmt für jede öpis anders. Für mich isch die Innetäsche, das i mier, wo all mini Erläbnis, mini Gedanke, mini Liebi, mi Schmärz - all die magische Sache drin sind, wo nur mier ghöred.

WALLS KEEP EVERYBODY OUT.
Boundaries SHOW PEOPLE WHERE
THE DOOR IS.

MARK GROVES

MINI Interessensgebiet

Mich interessiered so viel Theme, dasi eifach zwenig Ziit für alli han. Näbst Usbildige bini öper wo sich sehr gärn Wüsse sälber a eignet. So hani genau mini Interpretation devo. Ich finds unglaublich spannend, wie sich Chreis plötzlich schliessed, mit Wüsse us ganz verschiedne Bereich.

  • Sälbstheilig

  • Sälbstfürsorg

  • Psychologie

  • Persönlichkeitsentwicklig

  • Suizidalität

  • Wiiblichkeit / Männlichkeit

  • Gsundheit

  • Körperakzeptanz

 

  • Liebeschummer

  • gsundi Beziehige läbe

  • Zykle (Jahr, Läbe, Wiblich)

  • Ahnenarbeit

  • Sensitivität / Medialität

  • Häxe und Magie

  • Orakel und Tarot

  • Trancehealing